გოგი ალექსი-მესხიშვილის სახელოსნო

 რუსთაველის თეატრთან, კულტურის სამინისტროს დაფინანსებით, ჩემი სახელოსნო დაარსდა. გამოვაცხადეთ კონკურსი, რომელიც ორ ეტპად ჩატარდა. კონკურსი საკმაოდ დიდი იყო იმის მიუხედავად, რომ ცხელი ზაფხულია და ქალაქში თითქმის აღარავინ დარჩა. ჩატარდა ორი ტური, I ტურში იყო გასაუბრება, აბიტურიენტების ნამუშევრების ნახვა და გარჩევა. II ტურში გასულებს ჰქონდათ 1 კვირა დავალების შესასრულებლად. ყველასთან სათითაოდ ინდივიდუალურად მიდიოდა გაანალიზება თავიანთი ნამუშევრების, რის ნიადაგზეც 5 სტუდენტი იქნა ჩარიცხული. ასევე იყო რამდენიმე ძალიან კარგი აბიტურიენტი, რომლებსაც სხვადასხვა მიზეზის გამო ვერ ავიყვანდი (სამსახური, სწავლა, ოჯახი) და დავუშვი თავისუფალ მსმენელად.

     ნოემბრამდე გაგრძელდება საბუთების მიღება და 10 ნოემბრიდან დავიწყებ მეორე გამოცდას. 5 ადგილია დარჩენილი, ვეცდები ეს ადგილები შევავსო, თუ არადა იქნება უფრო პატარა ჯგუფი.

        ნებისმიერ ადამიანს შეუძლია შემოიტანოს განაცხადი 35წლამდე.

  პროფესია არის ძალიან რთული და გუნდური, რომელიც დაკავშირებულია რეჟისურასთან, თეატრის სხვადასხვა სპეციალობასთან და ვთვლი 35 წლის ადამიანისთვის ამ პროექტში ჩართვა დაგვიანებულია.

     მინდა, რომ ჯგუფი იყოს ერთი დონის, ცოტა მეტი ესმოდეს ამ პროფესიის, რომ არ დამჭირდეს ანბანის სწავლება. ვინც ავიყვანე, მათ უკვე რაღაც გამოცდილება აქვთ. როცა ვსაუბრობ გამოცდილებაზე არ არის აუცილებელი ეხებოდეს უშუალოდ თეატრს, ეს შეიძლება იყოს ხელოვნების ნებისმიერი დარგი.

    სწავლის პროცესი არის ორ წლიანი, არის უფასო. ისწავლება სამ განზომილებაში მუშაობა და ხატვა, ხაზვა, მოდელთან მუშაობა, ტექნიკური თეატრი, ბიუჯეტზე მუშაობა. წელიწადში გვექნება 5-6, შეიძლება უფრო მეტი პროექტი განსახორციელებელი. როცა დაამთავრებენ, იმედია იქნებიან პროფესიონალები და შეძლებენ საზღვარგარეთაც მუშაობას. არ არის აუცილებელი იმუშაონ თეატრში, შეიძლება წავიდნენ კინოში და სხვაგან. პროექტები იქნება ისეთი არჩეული, რომ გაიარონ სპეციფიკა როგორც ოპერის დრამატული თეატრის, ასევე სხვების. უკვე არჩეულები არიან პედაგოგები და დიდი იმედი მაქვს, რომ ჩვენ ქვეყანას ეს სახელოსნო ბევრ პროფესიონალს შესძენს.